HEPATITES

 

A hepatite é unha enfermidade transmisible inflamatoria difusa do tecido que forma o fígado, que pode ser aguda cando se desenvolve nun período curto, de semanas e se resolve en pouco tempo; ou crónica cando se alarga nun período de máis de 6 meses. A severidade da enfermidade depende de moitos factores entre os que encontramos a causa da enfermidade ou das subxacentes a ela. 

 

Creo que para entender a enfermidade e en parte algunhas das súas causas debería facer unha introdución sobre o órgano afectado, o fígado. A función do fígado regula a maior parte dos niveis químicos do sangue, xa que toda a sangue que sae do estómago e do intestino pasa polo fígado, quen a filtra. Ademais produce un líquido denominado bile, que axuda na descomposición das graxas durante a dixestión, facilitando a absorción. 

 

A etioloxía, é dicir, as causas da enfermidade son varias, entre as que atopamos os virus (5 virus distintos, nomeados da A á E polo abecedario), o abuso de alcohol e de fármacos.  Os 5 virus que causan 5 dos tipos de hepatite, son distintos entre eles en canto a xenoma, transmisión, cronicidade e malignidade e incluso tratamento, pero todo isto será presentado na seguinte entrada. 

 

Para falar en xeral sobre esta enfermidade, vamos tratar as manifestacións que presentan, posto que estas non presentan especificamente diferencias atribuíbles aos distintos tipos de virus, e que son a exposición dun complexo proceso dirixido a eliminar o virus do noso organismo. Principalmente, todas cursan con maior ou menor grado de insuficiencia hepática, e teñen 4 períodos de desenvolvemento:

1.    Incubación: este é o período que se atopa entre a exposición ao virus e a aparición da primeira sintomatoloxía.

2.    Prodrómico: etapa comprendida entre os primeiros síntomas ata a aparición da ictericia, e durante esta aparecen astenia (cansancio), anorexia (entendida como falta de apetito), náuseas e vómitos, cefalea (dor de cabeza) e artromialxias (dolor articular e muscular inespecífico). Pode aparecer coluria (ouriño oscuro) e acolia (feces brancas) os días previos á aparición da ictericia, debido á presenza da bile.  

3.    Clínico: neste período aparece a ictericia, pero desaparecen os síntomas da etapa anterior, polo que o enfermo se atopa subxectivamente mellor. Neste momento detectamos hepatomegalia dolorosa, que quere dicir que o fígado crece anormalmente de tamaño e doe, e ademais nos análises atopamos as transaminasas elevadas. 

4.    Recuperación.

 

En canto a esta enfermidade, as estatísticas indican que o número de mortes por hepatite causada por virus en España en 2019 foron de 482, habendo entón un descenso de 85 falecementos en comparación co ano 2018, e de 147 co 2017. Isto indícanos unha notoria pero paulatina diminución en canto a cifra de defuncións.  

 

Pero outra forma moi común de contraer esta enfermidade é por abuso de alcohol e de fármacos, o cal se debe á función do fígado de filtro. 

 

Nas próximas entradas falaremos sobre os tipos de hepatites e as súas diferencias, así como o seu diagnóstico e tratamento, entre outras cousas, que como sempre terán como obxectivo informar de maneira que se entenda facilmente, e resolver dúbidas comúns.

Moitas gracias por ler, e espero que isto sirva de axuda a alguén, ata a próxima!!

FONTES:

apuntes enfermería clínica 2022

https://es.statista.com/estadisticas/604808/numero-de-muertes-por-hepatitis-virica-en-espana/